Huye, Rwanda – Kuwa 7 Ukwakira 2025 – Ikigo gishinzwe Iterambere ry’Ubuhinzi n’Ubworozi mu Rwanda (RAB), binyuze mu mushinga KWIHAZA uterwa inkunga n’Igihugu cya Luxembourg ndetse n’Ubumwe bw’Ibihugu by’Uburayi (EU), cyateguye amahugurwa agenewe abashinzwe ubworozi bwo mu mazi n’uburobyi ku rwego rw’uturere (DAROs) n’imirenge (SAROs), hamwe n’abikorera batanga serivisi mu rwego rw’ubworozi bwo mu mazi n’uburobyi.

Aya mahugurwa yateguwe hagamijwe kongerera ubumenyi n’ubushobozi abakozi bashinzwe ubworozi bwo mu mazi n’uburobyi baturuka mu turere dukora ku biyaga, ndetse n’ahari ibikorwa by’ubworozi bw’amafi bw’icyitegererezo bukorerwa mu byuzi (model pond fish farms).

Abitabiriye aya amahugurwa bigishwijwe ibijyanye n’imikorere myiza mu bworozi bw’amafi, harimo uburyo butandukanye bwo korora amafi (mu byuzi, muri kareremba, mu ngunguru, no mu bworozi buvanze n’andi matungo), igenamigambi ry’ishoramari, isuzuma ry’ubwiza bw’amazi, itoranywa ry’imbuto z’amafi, gutegura no gukoresha indyo y’amafi iboneye, ndetse no gukumira indwara n’ibyonnyi bigabanya umusaruro.

Andi masomo yahawe abitabiriye aya mahugurwa ni ajyanye n’imicungire y’uburobyi, aho abitabiriye basobanukiwe ibijynye n’amoko y’amafi aboneka mu biyaga byo mu Rwanda, uburyo bwo kuyaroba neza, ibikoresho byifashishwa, n’amategeko agenga uburobyi n’ingamba zo kubahiriza ibisabwa mu mikorere y’ubworozi bwo mu mazi n’uburobyi burambye.Abitabiriye amahugurwa bose hamwe ni 144 baturuka mu turere twose tw’igihugu.  

Iyi gahunda yo kongerera ubushobozi abashinzwe ubworozi bwo mu mazi n’uburobyi yitezwe ho gufasha kunoza itangwa rya serivisi z’ubworozi bwo mu mazi n’uburobyi, guteza imbere imikorere myiza, no gushyigikira ubufatanye hagati y’inzego za Leta n’abikorera. Binitezwe ko izagira uruhare rukomeye mu kongera umusaruro w’amafi n’uburobyi, bikarushaho guteza imbere ubukungu bw’abaturage, kongera ubwinshi n’ubuziranenge bw’ibiribwa, no guteza imbere imibereho myiza y’Abanyarwanda.